"Assalamualaikom haba lon peuphon
Sanjong dari lon lewat udara
Ci baca rakan lon coba meupanton
Panton keu dek nong teuntang asmara
Na sidro dara teutangga di ulon
Leumpah meukeunoeng lagak that rupa
Sigeo takaloen tingat teuh sithon
Nyandum ukuran cantek si dara
Nan jih si ani ureung hei dek nong
Leh kareuna inong meunan geupeunama
Bagi lontuan asai ureung meukeunoeng
Hana tajak peureumeun keu suai nama
Yang keu pikiran jino lon susah
Dek nong meutuwah umu ka masa
Ngen rupa ceudah wajah yang mewah
Takot long di keubah goh sep beulanja
Nye that tapeutheun jadeh meuramah
Dek nong yang ceudah gop meurumoh tangga
Kiban keuh cara ulon peu siblah
Taneuk meunikah goh na beulanja
Harapan bak gata dara yang ceudah
Dua thon leupah tulong ta saba
Meunye na umu raseuki mudah
Langsong bak ayah jak pinang gata."
Nyan keuh nyan rakan bacut panton yang lon peugot keusaboh hiburan kontes #pehtem @cicisaja,nyan rakan aso panton jih hana sipeunoh jih lage kejadian tapi nyan untuk keu jeh manteng.,
Ka lheuh lon baca ka lon bouh keunira
Jangeuen asmara ka gata mulai
Si ani nama lam kisah cinta
Bungong keupula harom meuwangi
Pakon hai meunan adoe meutuwah
Ate bek susah gundah gulana
Adak tan peng jeut chit meunikah
Ta simak bagah lon peugah cara
Neujak beubagah bak si dara neu peugah
Lam lungkiek lipah neu duek lheuh insya
Neu set bak rakan yu peudrop bagah
Di yup bak lipah neu sandiwara
Yakin di ukon rakan meutuwah
Jadeh meunikah gata ban dua
Jeulamee ubit peurakan tan suwah
Bak geu peusiblah malee keluarga
Beutoi that aduen meutuwah
Memang cukop pah lage nyan cara
Tapi si dara han teunte jitem
Takheun dak jitem male teuh beraya.