NASIHAT ACEH

PANTÔN ACÈH
"NASIHAT"

Aneuk tiyông di công asan
Diyub saban ticém bruek bruek
Jameun jinoe tanyoe eu ban
Ramè insan dalam gabuek

Ék moto brôk béôk tan can
Dak got jalan teutap gerak gruk
Le lét dônya rata insan
Dum peue geutran bôh lam paruek

Công bak kayèe himbèe kawan
Riyôh sinan ateueh bayeuek
Keu asoë pruet jeuruet tiep jan
Keu alasan asi bèk deuek

Ujeun teuka subra tiep jan
Ban saboh nyan meusu cangguek
Haleue hareum taluem sajan
Asai na can laju geurudhuk

Keudè grông grông Warông makanan
Khas that sinan cit mi caluek
Nyo keu dônya rata dôyan
Perintah Tuhan jareueng gabuek,

Jak Meulabôh trôh unagan
Giok sinan le meusiseuk
Meuseujid le rata peukan
Nyang ramè keunan nyo na peue weuek,

Bulông Blang Ara na uroe peukan
Saptu sinan Ureueng that gabuek
Bèk lét dônya désya meukuyan
Mita amalan lam dônya taduek

Di Cot Puklat teumpat lôn tuan
Gura sinan na cit taluek
Ingat syédara Keupada Tuhan,
Nyotan amalan siksa lam ureuek,

Lambarô Kaphé
11 Rajab 1439 H, 29 Maret 2018 M,