Ca'e marhaban y ramazhan

Haba lon mula, lon pujoe Tuhan
Nyang Maha Rahman, Allah Ta'ala
Rahmat-Sijahtra, keu Nabi Khatam
Sahabat gobnyan, dan keuluarga
Assalamu'alaikum, Rakan ngon Taulan
Saleum lon layang, bandum sineuna
Han lon peubida, inong ngon agam
Banm,andum saban, Tuha ngon muda
Tamong puasa, chit euntreuk malam
Buleuen Ramadhan, nyoe katroh teuka
Buleuen beureukat, keu nyang meu iman
Dalam buleuen nyan, talatih taqwa
'Oh watee uroe, tanyoe latihan
Nafsu ta keukang, deungon puasa
Ta aja nafsu, juga 'oh malam
Deungon ta qiyam, amai shaliha
Keu ureueng-ureueng, nyang teubai iman
Hatee geuh seunang, sambot puasa
Didalam hatee, kana acuan
Peubut amalan, nyang Allah Ridha
Dalam buleun nyoe, geu ikat syaithan
Pintoe Jahannam, hana geubuka
Pintoe Syiruga, ka geubukakan
Wap keuleubehan, buleuen puasa
Bacut ta surah, geu ikat syaithan
Deungon peu teuman, wahee syedara
Nakeuh Puasa, nyang ta lakukan
Peungikat sinan, akan syaithana
Nibak geutanyoe, hana bisikan
Khatir Syaithan, masa nyoe hana
Namun saboh hai, neuperhatikan
Didikan Syaithan, nyang ka diaja
Yoh goh Tuhan, geu ikat syaithan
Dijih hai taulan, murid jih kana
Di aja nafsu, bak tiep-tiep insan
Lam kemungkaran, atawa lagha
Maka jinoe keuh, dalam Ramadhan
Ta aja ulang, nafsu nyang kana
Meungsoe tem aja, deungon 4 macam
Nak perubahan, meutuwah teuka
Cara ta latih, beu bacut makan
Beulee disinan, dalam meujaga
Hatee ta 'Uzlah, bek harok keramaian
Lee pujoe tuhan, keu 4 teuma
Meunyoe man 4, ka ta lakukan
Ureung meu iman, akan meutaqwa
Talakee do'a, berkat Ramadhan
Itqum minan naar, tanyoe sineuna
Gunong Gurutee, jalan meulinggang
Teumboh u Calang, Aceh jaya
Ulon top ca-e, lon kheun Marhaban
Yaa Ramadhan, Untuk semua..