Olim sudor Herculis,
monstra late conterens,
pestes orbis auferens,
claris longe titulis
enituit;
sed tandem defloruit
fama prius celebris,
cecis clausa tenebris,
Ioles illecebris
Alcide captivato.
Amor fame meritum
deflorat,
amans tempus perditum
non plorat,
sed misere
diffluere
sub Venere
laborat.
Hydra damno capitum
facta locupletior,
omni peste sevior,
reddere sollicitum
non potuit,
quem puella domuit.
iugo cessit Veneris
vir, qui maior superis
celum tulit humeris
Atlante fatigato.
Amor fame meritum
deflorat,
amans tempus perditum
non plorat,
sed misere
diffluere
sub Venere
laborat.
Caco tristis halitus
vel flammarum vomitus
vel fuga Nesso duplici
non profuit;
Gerion Hesperius
ianitorque Stygius,
uterque forma triplici
non terruit,
quem captivum tenuit
risu puella simplici.
Amor fame meritum
deflorat,
amans tempus perditum
non plorat,
sed misere
diffluere
sub Venere
laborat.
Iugo cessit tenero,
somno qui letifero
horti custodem divitis
implicuit,
frontis Acheloie
cornu dedit Copie,
apro, leone domitis
emicuit,
truces equos imbuit
cruenti cede hospitis.
Amor fame meritum
deflorat,
amans tempus perditum
non plorat,
sed misere
diffluere
sub Venere
laborat.
Antei Libyei
luctam sustinuit,
casus sophistici
fraudes cohibuit,
cadere dum vetuit;
sed qui sic explicuit
lucte nodosos nexus,
vincitur et vincitur,
dum labitur
magna Iovis soboles
ad Ioles
amplexus.
Amor fame meritum
deflorat,
amans tempus perditum
non plorat,
sed misere
diffluere
sub Venere
laborat.
Tantis floruerat
laborum titulis,
quem blandis carcerat
puella vinculis.
quem dum lambit osculis,
nectar huic labellulis
Venereum propinat;
vir solutus otiis
et gaudiis
laborum memoriam
et gloriam
inclinat.
Amor fame meritum
deflorat,
amans tempus perditum
non plorat,
sed misere
diffluere
sub Venere
laborat.
Sed Alcide fortior
aggredior
pugnam contra Venerem.
ut superem
hanc, fugio;
in hoc enim prelio
fugiendo fortius
et melius
pugnatur,
sicque Venus vincitur:
dum fugitur,
fugatur.
Amor fame meritum
deflorat,
amans tempus perditum
non plorat,
sed misere
diffluere
sub Venere
laborat.
Dulces nodos Veneris
et carceris
blandi seras resero,
de cetero
ad alia
dum traducor studia.
o Lichori, valeas
et voveas,
quod vovi:
ab amore spiritum
sollicitum
removi.
Amor fame meritum
deflorat,
amans tempus perditum
non plorat,
sed misere
diffluere
sub Venere
laborat.
Congratulations @arator! You have completed some achievement on Steemit and have been rewarded with new badge(s) :
Click on any badge to view your own Board of Honor on SteemitBoard.
For more information about SteemitBoard, click here
If you no longer want to receive notifications, reply to this comment with the word
STOP