MITA AMAI

Alhamdulillah lon pujoe tuhan
Oeh lheuh nibak nyan slaweut keu nabi
Teuma keu wareh sahbat ngoen taulan
Dan sekalian keu ummat nabi

Amma ba'du teuma oeh dudoe
Lon nak hareutoe meu saboh rawie
Ta mita amai keu uroe dudoe
Oeh watee tawoe keudeh bak rabbi

Ta pubut suroeh peu jioh teugah
Yang larang Allah bek ta keurija
Keubah yang hareum atau yang meukroeh
Bek roeh ta pajoh harta yang riba

Yoeh mantong hudep sinoe di alam
Mita amalan keu pangkai teuma
Ta pubuet amai yang kebajikan
Pubut sembahyang pujoe rabbana

Pulom karab troek buleun ramadhan
Perintah tuhan geuyu puasa
Pubut teuraweh oeh watee malam
Baca alquran mangat le fahla

Le that amalan buleun ramadhan
Sebab buleun nyan cukop mulia
Soe tem meu amai dalam buleun nyan
Janji bak tuhan tamoeng syiruga

Pulom meurumpok lailatul qadar
Nibak malam nyan luar biasa
Ubena makhluk yang na lam alam
Baca istiqhfar pujoe rabbana

Dum malaikat geutroen ubunoe
Jak saweu tanyoe yang na taquwa
Oeh ka lheuh fajar meu baroe neuwoe
Cukop that rugoe yang tan puasa

Ta mita amai yoeh mantoeng hudep
Kadang cit saket singoeh ngoen lusa
Oeh watee mate beuroeh meurateb
Mata teuh teupet ta tinggai donya

Oeh noe meumada haba karangan
Laen nibak nyan dudoe cerita
Bak laen kisah lon ci sampaikan
Asai lon tuan pinto neu buka

Wassalam.