TAJAGA BUNGONG DESA

Sikuntom bungong timoh di desa
pageu seulingka pancang that kokoh
tunong ngon baroh na ureung jaga
sibungong jeumpa miseu ulon boh

beungoh geusiram seupot geupula
bek hama jak cuca bungong di lampoh
kawat geuboh jarak si jeungka
harap beujaya mangat bek putoh

tapi teunyata oh ka dewasa
rame yang suka keunan jipiyoeh
han jan thoe reuoh wate ban teuka
ji peugah cinta gombal sireutoh

alahai kumbang pemuda desa
bek tajak cuca bungong di lampoh
bek tanit broh ban ta kalon rupa
bek tageulawa nyoe tapot hantroeh

bungong ban timoh umu that muda
pantas tajaga bek sampe luroh
walou di lampoh geutanyoe suka
tapi beuna neusaba wahe rakan beh

meunyoe ka wate cit ka jatah gata
tapi bek pura-pura wate tareuloh
ta ingat keu tuboh oh ban mala
male jih raya sahoe hana le roeh

keupu teuh guna islam teuh raya
meunyoe hana ta jaga aqidah ta sampoh
tanaman luroh habeh di jak cuca
yang leupah gura mandum ji pajoh

keugata dara bungong lam desa
beutetem jaga bek sampe layoh
asai deuh tikoh jok racon seurangga
nyak wabaputa geureuda sampoh