Hikayat Muda Seudang, Pt. 20; Jak Bloe Guda

SENAMBONG CEURITA

Dua jeum geujak di Muda Seudang
Ukeu geulanggang ka trouh teuka
Ramee dum ureueng meukat binatang
Hana deuh pandang nyang meukat guda

Geutanyoung u wie geu liwet u uneuen
Hana meubayeun meu saboh guda
Geu duek yup bak u uroe meurangeun
Bila meudiyeung geu peutoe saja

Watee ka di 'eue cot uroe timang
Nyak Muda Seudang mantong seudia
Saba geupreh ba dak jeut beu rijang
Bah jeut geu trajang jak meukeulana

Padum na trep bak uram bak u
Deuh geudeungoe su ureung bet saleuem
Assalamu'alaikom hai sinyak teungku
Meu'ah lon ganggu bak lon bri saleuem

'Alaikom salam geu jaweub bagah
Ulee geu tangah geu kalon rupa
Hana meuganggu meu ubee zarrah
Hana meuteugah meusoe nyang sapa

Meu'ah hai adoe lon tanyong masalah
Gata that susah lon kalon rupa
Lon peurati gata dari poh siblah
Ci gata peugah peu nyang ta mita

Neu kalon keunoe neu jingeuek keudeh
Hana nyang jadeh meujak beulanja
Kadang jeut lon tulong peu pah asoe keh
Nyak bek meutakeh ngon ureueng niaga

Meunoe hai aduen syara meutuah
Lon heut beu bagah meuneuk bloe guda
Peureulee di ulon jioh neuk langkah
Leupah meu sosah tan soe ba guda

Teuma geujaweueb ureueng ban teuka
Bek susah gata keu nyan masalah
Meunyoe beutoi neujak bloe guda
Neu ikot seureuta tajak beu bagah

Ayah wa amat na lhee boh guda
Reuncana geuneuek ba bak uroe peukan
Meuseu neujak bloe jeut lon ba gata
Jarak rumoh hana di miyup bak asan

Muda Seudang langsong seutuju
Langsong geu tuju geu ikout rakan
Beutoi han jioh rumoh geu tuju
Siat sikeutu katroh bak tujoan

Ee ayah wa ee neutubit siat
Na nyang meuhajat geuneuk bloe guda
Langsong geuteubiet ayah wa amat
Rinyeun geulumpat deungon si geura

Pat ureueng bloe hai nyak abeudo
Uroe ka leuho lon neuh eih siat
Di jaweueb teuma cut bang abeudo
Peu tiep-tiep leuho neujak eih siat

Nyoe pat adoe nyoe jineuek bloe guda
Padum hareuga neupeugah keudroe
Nyang peunteng keu lon beuna keu jasa
Sep ngon beulanja meu dua uroe

Nyang toh taneuek bloe hai aneuek muda
Na lhee boh guda silahkan pileh
Keu yum bek keuh yo hana that teuga
Asai na laba ngon lon bloe bileh

Muda Seudang geu kalon guda
Cukop that bida ngon amanah guree
Bulee jih coklat haloh meudoda
Tan na teugoda ta kalon gukee

Lon mita guda nyang itam sukla
Bulee meu cahya ikue jih keumang
Gukee jih rapat gaki peurkasa
Jiplueng sep teuga leupah geuransang

Saweueb that jioh lon neuk keulana
U nanggroe utara ulon neuk sasah
Watee hana trep tanggong that masa
Meunyoe pah guda teuntee trouh bagah

Meunyoe gata meuheut lagee nyan rupa
Jak ta peuriksa dilikot rumoh lon
Cocok neu kalon lon peugah hareuga
Pasti meubida ngon guda keubon

MEUSAMBONG

Bek tuwoe neubaca chit ata awai mangat meuho uram ngon ikue;